מקור ירמיהו י״ז
1 חַטַּ֣את יְהוּדָ֗ה כְּתוּבָ֛ה בְּעֵ֥ט בַּרְזֶ֖ל בְּצִפֹּ֣רֶן שָׁמִ֑יר חֲרוּשָׁה֙ עַל־ל֣וּחַ לִבָּ֔ם וּלְקַרְנ֖וֹת מִזְבְּחוֹתֵיכֶֽם׃
2 כִּזְכֹּ֤ר בְּנֵיהֶם֙ מִזְבְּחוֹתָ֔ם וַאֲשֵׁרֵיהֶ֖ם עַל־עֵ֣ץ רַעֲנָ֑ן עַ֖ל גְּבָע֥וֹת הַגְּבֹהֽוֹת׃
3 הֲרָרִי֙ בַּשָּׂדֶ֔ה חֵילְךָ֥ כׇל־אוֹצְרוֹתֶ֖יךָ לָבַ֣ז אֶתֵּ֑ן בָּמֹתֶ֕יךָ בְּחַטָּ֖את בְּכׇל־גְּבוּלֶֽיךָ׃
4 וְשָׁמַטְתָּ֗ה וּבְךָ֙ מִנַּחֲלָֽתְךָ֙ אֲשֶׁ֣ר נָתַ֣תִּי לָ֔ךְ וְהַעֲבַדְתִּ֙יךָ֙ אֶת־אֹ֣יְבֶ֔יךָ בָּאָ֖רֶץ אֲשֶׁ֣ר לֹא־יָדָ֑עְתָּ כִּֽי־אֵ֛שׁ קְדַחְתֶּ֥ם בְּאַפִּ֖י עַד־עוֹלָ֥ם תּוּקָֽד׃ ס
5 כֹּ֣ה אָמַ֣ר יְהֹוָ֗ה אָר֤וּר הַגֶּ֙בֶר֙ אֲשֶׁ֣ר יִבְטַ֣ח בָּאָדָ֔ם וְשָׂ֥ם בָּשָׂ֖ר זְרֹע֑וֹ וּמִן־יְהֹוָ֖ה יָס֥וּר לִבּֽוֹ׃
6 וְהָיָה֙ כְּעַרְעָ֣ר בָּעֲרָבָ֔ה וְלֹ֥א יִרְאֶ֖ה כִּֽי־יָ֣בוֹא ט֑וֹב וְשָׁכַ֤ן חֲרֵרִים֙ בַּמִּדְבָּ֔ר אֶ֥רֶץ מְלֵחָ֖ה וְלֹ֥א תֵשֵֽׁב׃ ס
7 בָּר֣וּךְ הַגֶּ֔בֶר אֲשֶׁ֥ר יִבְטַ֖ח בַּיהֹוָ֑ה וְהָיָ֥ה יְהֹוָ֖ה מִבְטַחֽוֹ׃
8 וְהָיָ֞ה כְּעֵ֣ץ שָׁת֣וּל עַל־מַ֗יִם וְעַל־יוּבַל֙ יְשַׁלַּ֣ח שׇׁרָשָׁ֔יו וְלֹ֤א ירא יִרְאֶה֙ כִּי־יָ֣בֹא חֹ֔ם וְהָיָ֥ה עָלֵ֖הוּ רַעֲנָ֑ן וּבִשְׁנַ֤ת בַּצֹּ֙רֶת֙ לֹ֣א יִדְאָ֔ג וְלֹ֥א יָמִ֖ישׁ מֵעֲשׂ֥וֹת פֶּֽרִי׃
9 עָקֹ֥ב הַלֵּ֛ב מִכֹּ֖ל וְאָנֻ֣שׁ ה֑וּא מִ֖י יֵדָעֶֽנּוּ׃
10 אֲנִ֧י יְהֹוָ֛ה חֹקֵ֥ר לֵ֖ב בֹּחֵ֣ן כְּלָי֑וֹת וְלָתֵ֤ת לְאִישׁ֙ כִּדְרָכָ֔ו כִּפְרִ֖י מַעֲלָלָֽיו׃ ס
11 קֹרֵ֤א דָגַר֙ וְלֹ֣א יָלָ֔ד עֹ֥שֶׂה עֹ֖שֶׁר וְלֹ֣א בְמִשְׁפָּ֑ט בַּחֲצִ֤י יָמָו֙ יַעַזְבֶ֔נּוּ וּבְאַחֲרִית֖וֹ יִהְיֶ֥ה נָבָֽל׃
12 כִּסֵּ֣א כָב֔וֹד מָר֖וֹם מֵרִאשׁ֑וֹן מְק֖וֹם מִקְדָּשֵֽׁנוּ׃
13 מִקְוֵ֤ה יִשְׂרָאֵל֙ יְהֹוָ֔ה כׇּל־עֹזְבֶ֖יךָ יֵבֹ֑שׁוּ יסורי וְסוּרַי֙ בָּאָ֣רֶץ יִכָּתֵ֔בוּ כִּ֥י עָזְב֛וּ מְק֥וֹר מַֽיִם־חַיִּ֖ים אֶת־יְהֹוָֽה׃ פ
14 רְפָאֵ֤נִי יְהֹוָה֙ וְאֵ֣רָפֵ֔א הוֹשִׁיעֵ֖נִי וְאִוָּשֵׁ֑עָה כִּ֥י תְהִלָּתִ֖י אָֽתָּה׃
15 הִנֵּה־הֵ֕מָּה אֹמְרִ֖ים אֵלָ֑י אַיֵּ֥ה דְבַר־יְהֹוָ֖ה יָ֥בוֹא נָֽא׃
16 וַאֲנִ֞י לֹא־אַ֣צְתִּי מֵרֹעֶ֣ה אַחֲרֶ֗יךָ וְי֥וֹם אָנ֛וּשׁ לֹ֥א הִתְאַוֵּ֖יתִי אַתָּ֣ה יָדָ֑עְתָּ מוֹצָ֣א שְׂפָתַ֔י נֹ֥כַח פָּנֶ֖יךָ הָיָֽה׃
17 אַל־תִּֽהְיֵה־לִ֖י לִמְחִתָּ֑ה מַחֲסִי־אַ֖תָּה בְּי֥וֹם רָעָֽה׃
18 יֵבֹ֤שׁוּ רֹֽדְפַי֙ וְאַל־אֵבֹ֣שָׁה אָ֔נִי יֵחַ֣תּוּ הֵ֔מָּה וְאַל־אֵחַ֖תָּה אָ֑נִי הָבִ֤יא עֲלֵיהֶם֙ י֣וֹם רָעָ֔ה וּמִשְׁנֶ֥ה שִׁבָּר֖וֹן שׇׁבְרֵֽם׃ ס
19 כֹּה־אָמַ֨ר יְהֹוָ֜ה אֵלַ֗י הָלֹ֤ךְ וְעָֽמַדְתָּ֙ בְּשַׁ֣עַר בְּנֵֽי־הָעָ֔ם עם אֲשֶׁ֨ר יָבֹ֤אוּ בוֹ֙ מַלְכֵ֣י יְהוּדָ֔ה וַאֲשֶׁ֖ר יֵ֣צְאוּ ב֑וֹ וּבְכֹ֖ל שַׁעֲרֵ֥י יְרוּשָׁלָֽ͏ִם׃
20 וְאָמַרְתָּ֣ אֲ֠לֵיהֶ֠ם שִׁמְע֨וּ דְבַר־יְהֹוָ֜ה מַלְכֵ֤י יְהוּדָה֙ וְכׇל־יְהוּדָ֔ה וְכֹ֖ל יֹשְׁבֵ֣י יְרוּשָׁלָ֑͏ִם הַבָּאִ֖ים בַּשְּׁעָרִ֥ים הָאֵֽלֶּה׃
21 כֹּ֚ה אָמַ֣ר יְהֹוָ֔ה הִשָּׁמְר֖וּ בְּנַפְשׁוֹתֵיכֶ֑ם וְאַל־תִּשְׂא֤וּ מַשָּׂא֙ בְּי֣וֹם הַשַּׁבָּ֔ת וַהֲבֵאתֶ֖ם בְּשַׁעֲרֵ֥י יְרֽוּשָׁלָֽ͏ִם׃
22 וְלֹא־תוֹצִ֨יאוּ מַשָּׂ֤א מִבָּֽתֵּיכֶם֙ בְּי֣וֹם הַשַּׁבָּ֔ת וְכׇל־מְלָאכָ֖ה לֹ֣א תַעֲשׂ֑וּ וְקִדַּשְׁתֶּם֙ אֶת־י֣וֹם הַשַּׁבָּ֔ת כַּאֲשֶׁ֥ר צִוִּ֖יתִי אֶת־אֲבוֹתֵיכֶֽם׃
23 וְלֹ֣א שָׁמְע֔וּ וְלֹ֥א הִטּ֖וּ אֶת־אׇזְנָ֑ם וַיַּקְשׁוּ֙ אֶת־עׇרְפָּ֔ם לְבִלְתִּ֣י שומע שְׁמ֔וֹעַ וּלְבִלְתִּ֖י קַ֥חַת מוּסָֽר׃
24 וְ֠הָיָ֠ה אִם־שָׁמֹ֨עַ תִּשְׁמְע֤וּן אֵלַי֙ נְאֻם־יְהֹוָ֔ה לְבִלְתִּ֣י הָבִ֣יא מַשָּׂ֗א בְּשַׁעֲרֵ֛י הָעִ֥יר הַזֹּ֖את בְּי֣וֹם הַשַּׁבָּ֑ת וּלְקַדֵּשׁ֙ אֶת־י֣וֹם הַשַּׁבָּ֔ת לְבִלְתִּ֥י עֲשֽׂוֹת־בֹּ֖ה כׇּל־מְלָאכָֽה׃
25 וּבָ֣אוּ בְשַׁעֲרֵ֣י הָעִ֣יר הַזֹּ֡את מְלָכִ֣ים וְשָׂרִ֡ים יֹשְׁבִים֩ עַל־כִּסֵּ֨א דָוִ֜ד רֹכְבִ֣ים בָּרֶ֣כֶב וּבַסּוּסִ֗ים הֵ֚מָּה וְשָׂ֣רֵיהֶ֔ם אִ֥ישׁ יְהוּדָ֖ה וְיֹשְׁבֵ֣י יְרוּשָׁלָ֑͏ִם וְיָשְׁבָ֥ה הָעִיר־הַזֹּ֖את לְעוֹלָֽם׃
26 וּבָ֣אוּ מֵעָרֵֽי־יְ֠הוּדָ֠ה וּמִסְּבִיב֨וֹת יְרוּשָׁלַ֜͏ִם וּמֵאֶ֣רֶץ בִּנְיָמִ֗ן וּמִן־הַשְּׁפֵלָ֤ה וּמִן־הָהָר֙ וּמִן־הַנֶּ֔גֶב מְבִאִ֛ים עוֹלָ֥ה וְזֶ֖בַח וּמִנְחָ֣ה וּלְבוֹנָ֑ה וּמְבִאֵ֥י תוֹדָ֖ה בֵּ֥ית יְהֹוָֽה׃
27 וְאִם־לֹ֨א תִשְׁמְע֜וּ אֵלַ֗י לְקַדֵּשׁ֙ אֶת־י֣וֹם הַשַּׁבָּ֔ת וּלְבִלְתִּ֣י שְׂאֵ֣ת מַשָּׂ֗א וּבֹ֛א בְּשַׁעֲרֵ֥י יְרוּשָׁלַ֖͏ִם בְּי֣וֹם הַשַּׁבָּ֑ת וְהִצַּ֧תִּי אֵ֣שׁ בִּשְׁעָרֶ֗יהָ וְאָ֥כְלָ֛ה אַרְמְנ֥וֹת יְרוּשָׁלַ֖͏ִם וְלֹ֥א תִכְבֶּֽה׃ פ
פירוש רש"י על ירמיהו י״ז
1 בְּעֵט בַּרְזֶל. מָשָׁל הוּא, כְּלוֹמַר: חֲקוּקָה בְּשִׁקּוּעַ וְאֵין נוֹחָה לִמְחוֹק. וּמִדְרַשׁ אַגָּדָה בְּעֵט בַּרְזֶל בְּצִפֹּרֶן שָׁמִיר עַל יְדֵי יִרְמְיָה שֶׁנִּקְרָא עַמּוּד בַּרְזֶל, וְעַל יְדֵי יְחֶזְקֵאל שֶׁנֶּאֱמַר לוֹ״ כַּשָּׁמִיר חָזָק מִצּוּר נָתַתִּי מִצְחֶךָ״ יחזקאל ג:ט:
2 חֲרוּשָׁה. חֲקוּקָה, כְּזֶה שֶׁהוּא חוֹרֵשׁ בָּעֹמֶק:
3 עַל לוּחַ לִבָּם. שֶׁאֵינָם שׁוֹכְחִין עֲבוֹדָה זָרָה שֶׁלָּהֶם:
4 כִּזְכֹּר בְּנֵיהֶם מִזְבְּחוֹתָם. כִּזְכִירַת בְּנֵיהֶם כֵּן הָיְתָה לָהֶם זְכִירַת מִזְבְּחוֹתָם; כְּאָדָם שֶׁיֵּשׁ לוֹ גִּעְגּוּעִין עַל בְּנוֹ סנהדרין סג::
5 וַאֲשֵׁרֵיהֶם. אֲשֶׁר עַל עֵץ רַעֲנָן. עַל עֵץ – כְּמוֹ אֵצֶל, וְכֵן תִּרְגֵּם יוֹנָתָן: ״תְּחוֹת כָּל אִילָן עֲבוּף״:
6 הֲרָרִי בַּשָּׂדֶה. יְרוּשָׁלַיִם הַיּוֹשֶׁבֶת בָּהָר הַמִּישׁוֹר ירמיה כא:יג, כָּל סְבִיב הָעִיר מִישׁוֹר, שָׂדֶה. וְלָשׁוֹן הֲרָרִי – כְּמוֹ ״עֲרָבִי״ ישעיה יג:כ, עַל שֵׁם שֶׁיּוֹשֵׁב בָּעֲרָבָה; מוֹנְטִינְיֵיר״שׁ בְּלַעַ״ז, יוֹשְׁבֵי הָהָר ספרים ארחים יוֹשֶׁבֶת הָהָר:
7 חֵילְךָ. כְּמוֹ מָמוֹנְךָ ראה דברים ח:יז:
8 בָּמוֹתֶיךָ בְּחַטָּאת. בָּמוֹתֶיךָ עֲשׂוּיוֹת בְּחֵטְא לְשֵׁם עֲבוֹדָה זָרָה בְּכָל גְּבוּלֶיךָ:
9 וְשָׁמַטְתָּה. עַל כָּרְחֲךָ תִּשְׁמַט אַרְצְךָ אֶת אֲשֶׁר לֹא שָׁבְתָה בְּשַׁבְּתוֹתֵיכֶם ויקרא כו:לה, שֶׁאָמַרְתִּי לָכֶם ״וְשָׁבְתָה הָאָרֶץ״ ויקרא כה:ב:
10 וּבְךָ. אֶנָּקֵם מֵחֲמַת נַחֲלָתְךָ אֲשֶׁר נָתַתִּי לָךְ שֶׁלֹּא עָשִׂיתָ רְצוֹנִי לְהַשְׁמִיטָהּ, דָּבָר אַחֵר: וּבְךָ מִנַּחֲלָתְךָ – וּבְךָ אֶנָּקֵם מִנַּחֲלָתְךָ, שֶׁאַגְלֶה אוֹתְךָ מִמֶּנָּה:
11 כִּי אֵשׁ קְדַחְתֶּם בְּאַפִּי. יְקַדְתֶּם בִּנְחִירַי:
12 אֲשֶׁר יִבְטַח בָּאָדָם. בַּחֲרִישׁוֹ וּקְצִירוֹ, לוֹמַר: אֶזְרַע בַּשְּׁבִיעִית וְאֹכַל:
13 זְרוֹעוֹ. כְּמוֹ עֶזְרוֹ, וְכֵן תִּרְגֵּם יוֹנָתָן: ״רוּחְצָנֵיהּ״:
14 וּמִן ה׳ יָסוּר לִבּוֹ. שֶׁהִבְטִיחוֹ: ״וְצִוִּיתִי אֶת בִּרְכָתִי לָכֶם״ ויקרא כה:כא. כָּךְ שָׁמַעְתִּי:
15 כְּעַרְעָר. כְּעֵץ יְחִידִי; לְשׁוֹן ״עֲרִירִי״ בראשית טו:ב. וְיֵשׁ אוֹמֵר: דְּגַאשְׁטִי״הּ בְּלַעַ״ז. וּמְנַחֵם פֵּירֵשׁ: שֵׁם עֵץ מֵעֲצֵי הַיַּעַר וְעַרְעָר שְׁמוֹ; וְכֵן פֵּירֵשׁ ״כְּעַרְעָר בַּמִּדְבָּר״ ירמיה מח:ו: עֵץ אֶחָד מֵעֲצֵי הַיַּעַר:
16 בָּעֲרָבָה. לְשׁוֹן מִישׁוֹר:
17 חֲרֵרִים. יֹבֶשׁ, כְּמוֹ ״חָרָה מִנִּי חֹרֶב״ איוב ל:ל:
18 אֶרֶץ מְלֵחָה. אֶרֶץ שֶׁהִיא מְלֵחָה וְלֹא תְהֵא מְיֻשֶּׁבֶת:
19 וְלֹא יִרְאֶה. הָעֵץ כִּי יָבֹא חֹם:
20 בַּצֹּרֶת. לְשׁוֹן רָעָב פאמצ״א בְּלַעַ״ז,.לָשׁוֹן אַחֵר: בַּצֹּרֶת לְשׁוֹן מִבְצָר, וְכֵן חִבְּרוֹ מְנַחֵם:
21 לֹא יִדְאָג. לֹא יִפְחַד:
22 עָקֹב הַלֵּב. מָלֵא תּוֹאֲנָה וַעֲקֻבָּה מִכֹּל רָעָה:
23 וְאָנוּשׁ. לְשׁוֹן חֹלִי, וְחָלְיוֹ הוּא זֶה:
24 מִי יֵדָעֶנּוּ. הוּא סָבוּר: מִי יֵדָעֶנּוּ. אֲנִי ה׳ חוֹקְרוֹ:
25 קוֹרֵא דָגַר. קוּקוּ״וּ גְלוּנְצְנְ״ט בְּלַעַ״ז:
26 וְלֹא יָלָד. הַקּוֹרֵא הַזֶּה מוֹשֵׁךְ אַחֲרָיו אֶפְרוֹחִים שֶׁלֹּא יָלָד. דָּגַר. צִפְצוּף שֶׁמְּצַפְצֵף הָעוֹף בְּקוֹלוֹ לִמְשׁוֹךְ אֶפְרוֹחִין אַחֲרָיו, וְאֵלּוּ שֶׁהַקּוֹרֵא דָּגַר לֹא יֵלְכוּ אַחֲרָיו מִשֶּׁיִּגְדְּלוּ שֶׁאֵינָם מִינוֹ, כָּךְ עֹשֶׂה עֹשֶׁר וְלֹא בְמִשְׁפָּט:
27 יִהְיֶה נָבָל. ״מִתְקְרֵי רְשִׁיעָא״ תרגום יונתן:
28 כִּסֵּא כָבוֹד וגו׳. לְפִי שֶׁבָּא לוֹמַר כָּל עֹזְבֶיךָ יֵבֹשׁוּ, מַתְחִיל בְּקִלּוּסוֹ שֶׁל מָקוֹם וּמְדַבֵּר לְפָנָיו: אַתָּה, שֶׁכִּסֵּא כָבוֹד וּמָרוֹם מֵרֵאשִׁית בְּרִיאַת עוֹלָם וּמְכֻוָּן כְּנֶגֶד מִקְדָּשֵׁנוּ:
29 מִקְוֵה יִשְׂרָאֵל. ה׳ יוֹשֵׁב עָלָיו, לְפִיכָךְ כָּל עֹזְבֶיךָ יֵבֹשׁוּ:
30 וְסוּרַי בָּאָרֶץ יִכָּתֵבוּ. אוֹתָם שֶׁסָּרִים מִדְּבָרַי, שֶׁאֵינָם שׁוֹמְעִים שְׁלִיחוּתִי, בְּקִבְרוֹת תַּחְתִּיּוֹת אֶרֶץ יִכָּתֵבוּ:
31 כִּי תְהִלָּתִי אָתָּה. בְּךָ אֲנִי מִתְהַלֵּל וּמִתְפָּאֵר לוֹמַר שֶׁאַתָּה מוֹשִׁיעִי:
32 תְּהִלָּתִי. וונטנצ״א בְּלַעַ״ז:
33 אַיֵּה דְּבַר ה׳. הַפּוּרְעָנִיּוֹת שֶׁאַתָּה מִתְנַבֵּא:
34 וַאֲנִי לֹא אַצְתִּי. לֹא מִהַרְתִּי לְזָרֶזְךָ לַהֲבִיאָם, מִהְיוֹת רֹעֶה טוֹב מְחַזֵּר אַחֲרֶיךָ לְבַקֵּשׁ עֲלֵיהֶם רַחֲמִים:
35 וְיוֹם אָנוּשׁ. חֹלִי שֶׁל פֻּרְעָנוּת לֹא הִתְאַוֵּיתִי. וְיוֹנָתָן תִּרְגֵּם: ״וַאֲנָא לָא עַנְבִּית עַל מֵימְרָךְ מִלְּהִתְנַבָּאָה עֲלֵיהוֹן לַאֲתָבוּתְהוֹן לְדַחַלְתָּךְ״. וּלְפִי הַתַּרְגּוּם יִהְיֶה אַצְתִּי – לְשׁוֹן עִכּוּב, כְּלוֹמַר: לֹא עִכַּבְתִּי מִלּוֹמַר לָהֶם שְׁלִיחוּתֶיךָ וּלְהָשִׁיבָם אֵלֶיךָ, אִם הָיוּ שׁוֹמְעִים אֵלַי:
36 מוֹצָא שְׂפָתַי נֹכַח פָּנֶיךָ הָיָה. לְהָשִׁיב אֶת חֲמָתְךָ מֵהֶם:
37 אַל תִּהְיֵה לִי לִמְחִתָּה. אַל יְהִי שְׁלִיחוּתְךָ לִמְחִתָּה:
38 יֵבֹשׁוּ רֹדְפַי. אַנְשֵׁי עֲנָתוֹת לְבַדָּם:
39 וְלֹא שָׁמְעוּ. אֲבוֹתֵיכֶם לְמַה שֶּׁצִּוִּיתִים:
40 וּבֹא. כְּמוֹ וְלָבֹא: